Benedictio et impositio
Scapularis S. Joseph sponsis B.M.V.

Suscepturus Scapulare genuflectit ; et Sacerdos, superpelliceo et stola alba indutus, dicit :

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Pro uno vel una.

Dómine Jesu Christe, qui custódiæ sancti Joseph, Sponsi immaculátæ Genitrícis tuæ Maríæ, commítti voluísti : hoc vestiménti genus ad Ecclésiæ tuæ fidélium tutámen institútum bene+dícere dignéris ; ut (hic fámulus tuus vel hæc fámula tua) sub ejúsdem sancti Joseph protectióne pie et tute tibi servíre váleat : Qui vivis et regnas in sæcula sæculórum

Pro pluribus.

Dómine Jesu Christe, qui custódiæ sancti Joseph, Sponsi immaculátæ Genitrícis tuæ Maríæ, commítti voluísti : hoc vestiménti genus ad Ecclésiæ tuæ fidélium tutámen institútum bene+dícere dignéris ; ut (hi fámuli tui vel hæ fámulæ tuæ) sub ejúsdem sancti Joseph protectióne pie et tute tibi servíre váleant : Qui vivis et regnas in sæcula sæculórum.

R. Amen.

Postea Sacerdos Scapulare aspergat aqua benedicta, illudque imponat dicens :

Accipe, (frater vel soror), Scapuláre sancti Joseph Sponsi beátæ Maríæ Vírginis, ut eo protectóre et custóde, contra diáboli nequítias (defénsus vel defénsa), ad vitam pervénias sempitérnam. Per Christum Dóminum nostrum.

R. Amen.

Deinde, flexis genibus, trina vice, una cum adscripto, dicat vernaculo idiomate :

Sancte Joseph, Protéctor noster, ora pro nobis.