Benedictio et impositio
Scapularis B.M.V. de Monte Carmelo

Formula brevior approbata a S.R.C. die 24^a mensis julii A.D. 1888

Persona recipienda ad habitum genuflexa, Sacerdos superpelliceo et stola albi coloris, aut saltem stola indutus, dicat :

V. Osténde nobis, Dómine, misericórdiam tuam.

R. Et salutáre tuum da nobis.

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Pro uno vel una :

Dómine Jesu Christe, humáni géneris Salvátor, hunc hábitum, quem propter tuum tuæque Genitrícis Vírginis Maríæ de Monte Carmélo amórem (servus tuus vel ancílla tua) devóte est (delatúrus vel delatúra) déxtera tua sanctí+fica, ut eádem Genitríce tua intercedénte, ab hoste malígno (defénsus vel defénsa) in tua grátia usque ad mortem persevéret : Qui vivis et regnas in sæcula sæculórum.

R. Amen.

Pro pluribus :

Dómine Jesu Christe, humáni géneris Salvátor, hunc hábitum, quem propter tuum tuæque Genitrícis Vírginis Maríæ de Monte Carmélo amórem (servi tui vel ancíllæ tuæ) devóte sunt (delatúri vel delatúræ) déxtera tua sanctí+fica, ut eádem Genitríce tua intercedénte, ab hoste malígno (defénsi vel defénsæ) in tua grátia usque ad mortem persevérent : Qui vivis et regnas in sæcula sæculórum.

R. Amen.

Deinde aspergat habitum aqua benedicta, et postea illum imponat personæ, vel personis (cuilibet separatim) dicens :

(Accipe vel Accípite) hunc hábitum benedíctum (precans vel precántes) sanctíssimam Vírginem, ut ejus méritis illum (pérferas vel perferátis) sine mácula, et (te vel vos) ab omni adversitáte deféndat, atque ad vitam perdúcat ætérnam.

R. Amen.

Postea subjungat :

Ego, ex potestáte mihi concéssa, recípio (te vel vos) ad participatiónem ómnium bonórum spirituálium, quæ, cooperánte misericórdia Jesu Christi, a Religiósis de Monte Carmélo peragúntur. In nómine Pa+tris, et Fílii, et Spíritus Sancti.

R. Amen.

Bene+dícat (te vel vos) Cónditor cæli et terræ, Deus omnípotens, qui (te vel vos) cooptáre dignátus est in Confraternitátem beátæ Maríæ Vírginis de Monte Carmélo : quam exorámus, ut in hora óbitus (tui vel vestri) cónterat caput serpéntis antíqui, atque palmam et corónam sempitérnæ hereditátis tandem (consequáris vel consequámini). Per Christum Dóminum nostrum.

R. Amen.

Aspergatur persona aqua benedicta. Si plures simul recipiendi sint, mutetur numerus. Si Habitus solummodo benedicendus sit, tunc benedictio incipit a V. Osténde, et concluditur cum Oratione Dómine Jesu Christe.