Benedictio personæ
in honorem et cum invocatione B.M.V.
sub titulo Auxilium Christianorum

Approbata a S.R.C. pro Archidiœcesi Taurinensi.

Sacerdos superpelliceo ac stola alba indutus dicit :

V. Adjutórium nostrum in nómine Dómini.

R. Qui fecit cælum et terram.

Ant. Ave, María, grátia plena, Dóminus tecum ; benedícta tu in muliéribus, et benedíctus fructus ventris túi, Iesus. Sancta María, Mater Dei, ora pro nobis peccatóribus, nunc et in hora mortis nostræ. Amen.

Ant. Sub tuum præsídium confúgimus, Sancta Dei Génitrix : nostras deprecatiónes ne despícias in necessitátibus nostris, sed a perículis cunctis líbera nos, semper Virgo gloriósa et benedícta.

V. María, Auxílium Christianórum.

R. Ora pro nobis.

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Omnípotens sempitérne Deus, qui gloriósæ Vírginis Matris Maríæ corpus et ánimam, ut dignum Fílii tui habitáculum éffici mererétur, Spíritu Sancto coopérante, præparásti : da, ut, cujus commemoratióne lætámur, ejus pia intercessióne ab instántibus malis et a morte perpétua liberémur. Per eúmdem Christum Dóminum nostrum.

R. Amen.

Et personam benedicendam aut personas benedicendas aspergat aqua benedicta.

Benedíctio Dei omnipoténtis, Pa+tris, et Fílii, et Spíritus Sancti, descéndat super (te vel vos), et máneat semper.

R. Amen.