Benedictio Numismatum
Sancti Benedicti

Propria ejusdem Ordinis
Formula brevior approbata a S.R.C.
die 13^a mensis decembris A.D. 1922

Sacerdos benedicturus numismata sancti Benedicti, dicit :

V. Adjutórium nostrum in nómine Dómini.

R. Qui fecit cælum et terram.

Exorcízo vos, numísmata, per Deum Pa+trem omnipoténtem, qui fecit cælum et terram, mare et ómnia, quæ in eis sunt. Omnis virtus adversárii, omnis exércitus diáboli, et omnis incúrsus, omne phantásma sátanæ, eradicáre et effugáre, ab his numismátibus : ut fiant ómnibus qui eis usúri sunt, salus mentis et córporis : in nómine Pa+tris omnipoténtis, et Jesu + Christi Fílii ejus, Dómini nostri, et Spíritus + Sancti Parácliti, et in caritáte ejúsdem Dómini nostri Jesu Christi, qui ventúrus est judicáre vivos et mórtuos, et sæculum per ignem.

R. Amen.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Orémus.          Oratio.

Deus omnípotens, bonórum ómnium largítor, súpplices te rogámus, ut per intercessiónem sancti Benedícti his sacris numismátibus tuam bene+dictiónem infúndas, ut omnes qui ea gestáverint ac bonis opéribus inténti fúerint, sanitátem mentis et córporis, et grátiam sanctificatiónis, atque indulgéntias [nobis] concéssas cónsequi mereántur, omnésque diáboli insídias et fraudes, per auxílium misericórdiæ tuæ, stúdeant devitáre et in conspéctu tuo sancti et immaculáti váleant apparére. Per Christum Dóminum nostrum.

R. Amen.

Et aspergantur aqua benedicta.