Benedictio et Impositio
sacri Numismatis B.M.V. Immac.

vulgo Médaille miraculeuse

Propria Congr. Missionis
(Approbata a S.R.C. die 19^a mensis aprilis AD 1895)

Sacerdos benedícturus sacrum Numisma immaculatæ Vírginis Maríæ Conceptionis, superpelliceo et stola alba indutus, dicit :

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Omnípotens et miséricors Deus, qui per multíplices immaculátæ Maríæ Vírginis apparitiónes in terris mirabília júgiter pro animárum salúte operári dignátus es : super (hoc vel hæc) numísmatis (signum vel signa), tuam bene+dictiónem benígnus infúnde ; ut pie (hoc vel hæc) recoléntes ac devóte gestántes et (illíus vel illórum) patrocínium séntiant et tuam misericórdiam consequántur. Per Christum Dóminum nostrum.

R. Amen.

Deinde Numisma(-ta) aspergit aqua benedicta, et ipsum(-a) postea imponens dicit :

Pro uno vel una :

Áccipe sanctum Numísma, gesta fidéliter, et digna veneratióne proséquere : ut piíssima et immaculáta cælórum Dómina te prótegat atque deféndat ; et pietátis suæ prodígia rénovans, quæ a Deo supplíciter postuláveris, tibi misericórditer ímpetret, ut vivens ac móriens in matérno ejus ampléxu felíciter requiéscas. Amen.

Pro pluribus :

Accípite sanctum Numísma, gestáte fidéliter, et digna veneratióne prosequímini : ut piíssima immaculáta cælórum Dómina vos prótegat atque deféndat ; et pietátis suæ prodígia rénovans, quæ a Deo supplíciter postulavéritis, vobis misericórditer ímpetret, ut vivéntes ac moriéntes in matérno ejus ampléxu féliciter requiescátis. Amen.

Inde prosequitur :

Kýrie, eléison.
Christe, eléison.
Kýrie, eléison.

V. Pater noster… secreto usque ad…
et ne nos indúcas in tentatiónem.

R. Sed líbera nos a malo.

V. Regína sine labe origináli concépta.

R. Ora pro nobis.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Orémus.          Oratio.

Dómine Jesu Christe, qui beatíssimam Vírginem Mariam matrem tuam ab origine immaculátam innúmeris miráculis claréscere voluísti : concéde ; ut ejúsdem patrocínium semper implorántes, gáudia consequámur ætérna : qui vivis et régnas in sæcula sæculórum.

R. Amen.