Benedictio mulieris prægnantis

vel in periculis partus
– formula longior –

V. Adjutórium nostrum in nómine Dómini.

R. Qui fecit cælum et terram.

V. Salvam fac ancíllam tuam.

R. Deus meus, sperántem in te.

V. Esto nobis, Dómine, turris fortitúdinis.

R. A fácie inimíci.

V. Nihil profíciat inimícus in ea.

R. Et fílius iniquitátis non appónat nocére ei.

V. Mitte ei, Domine, auxílium de sancto.

R. Et de Sion tuére eam.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Orémus.          Oratio.

Omnípotens sempitérne Deus, qui dedísti fámulis tuis in confessióne veræ fídei ætérnæ Trinitátis glóriam agnóscere, et in poténtia majestátis adoráre unitátem : quæsumus ; ut ejúsdem fídei firmitáte hæc fámula tua N. ab ómnibus semper muniátur advérsis. Per Christum Dóminum nostrum.

R. Amen.

Orémus.          Oratio.

Dómine Deus, ómnium Creátor, fortis et terríbilis, justus et miséricors, qui solus bonus et pius es ; qui de omni malo liberásti Israël, fáciens tibi patres nostros diléctos, et sanctificásti eos manu Spíritus tui ; qui gloriósæ Vírginis Maríæ corpus et ánimam, ut dignum Fílii tui habitáculum éffici mererétur, Spíritu Sancto coopérante præparásti ; qui Joánnem Baptístam Spíritu Sancto replésti, et in utero matris exsultáre fecísti ; áccipe sacrifícium cordis contríti, ac fervens desidérium fámulæ tuæ N. humíliter supplicántis pro conservatióne prolis, quam ei dedísti concípere : custódi partem tuam, et ab omni dolo et injúria duri hostis defénde ; ut obstetricánte manu misericórdiæ tuæ fétus ejus ad lucem próspere véniat, ac sanctæ generatióni servétur, tibíque in ómnibus júgiter desérviat, et vitam cónsequi mereátur ætérnam. Per eúmdem Dóminum nostrum Jesum Christum, Fílium tuum, qui tecum vivit et regnat in unitáte ejúsdem Spíritus Sancti, Deus, per ómnia sæcula sæculórum.

R. Amen.

Deinde mulier aspergatur aqua benedicta, et mox dicatur :

Psalmus 66.

Deus misereátur nostri, et benedícat nobis : * illúminet vultum tuum super nos, et misereátur nostri.
Ut cognoscámus in terra viam tuam : * in ómnibus Géntibus salutáre tuum.
Confiteántur tibi pópuli, Deus : * confiteántur tibi pópuli omnes.
Læténtur et exsúltent Gentes : * quóniam júdicas pópulos in æquitáte, et Gentes in terra dírigis.
Confiteántur tibi pópuli, Deus, confiteántur tibi pópuli omnes : * terra dédit fructum suum.
Benedícat nos Deus, Deus noster, benedícat nos Deus : * et métuant eum omnes fines terræ.
Glória Patri, et Fílio, * et Spirítui Sancto ;
Sicut erat in princípio et nunc et semper * et in sæcula sæculorum. Amen.

V. Benedicámus Patrem, et Fílium, cum Sancto Spíritu.

R. Laudémus et superexaltémus eum in sæcula.

V. Ángelis suis Deus mandávit de te.

R. Ut custódiant te in ómnibus viis tuis.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Orémus.          Oratio.

Vísita, quæsumus, Dómine, habitatiónem istam, et omnes insídias inimíci ab ea, et a præsénti, fámula tua N. longe repélle : Ángeli tui sancti hábitent in ea, qui eam et ejus prolem in pace custódiant, et bene+díctio tua sit super eam semper. Salva eos, omnípotens Deus, et lucem eis tuam concéde perpétuam. Per Christum Dóminum nostrum.

R. Amen.

Benedíctio Dei omnipoténtis, Pa+tris, et Fílii, et Spíritus Sancti, descéndat super te, et prolem tuam, et máneat semper.

R. Amen.