Benedictio mulieris post partum

Cum puerpera post partum, iuxta piam et laudabilem consuetudinem ad ecclesiam venerit, pro incolumitate gratias Deo actura ; præ foribus ecclesiæ exspectet sacerdotem, ut ab eo benedictionem accipiat. Ubi sacerdos superpelliceo et stola alba indutus, benedicat eam, infrascriptos psalmos et preces recitans.

V. Adjutórium nostrum in nómine Dómini.

R. Qui fecit cælum et terram.

Ant. Hæc accipiet benedictionem a Domino, et misericordiam a Deo salutari suo : quia hæc est generatio quærentium Dominum.

Psalmus 23.

Domini est terra et plenitudo eius, * orbis terrarum et universi, qui habitant in eo ;
Quia ipse super maria fundavit eum, * et super flumina præparavit eum.
Quis ascendet in montem Domini, * aut quis stabit in loco sancto eius ?
Innocens manibus et mundo corde, † qui non accepit in vano animam suam, * nec iuravit in dolo proximo suo.
Hic accipiet benedictionem a Domino, * et misericordiam a Deo salutari suo.
Hæc est generatio quærentium eum, * quærentium faciem Dei Iacob.
Attollite portas, principes, vestras, † et elevamini, portæ æternales, * et introibit rex gloriæ !
Quis est iste rex gloriæ ? † Dominus fortis et potens, * Dominus potens in prælio.
Attollite portas, principes, vestras, † et elevamini, portæ æternales, * et introibit rex gloriæ !
Quis est iste rex gloriæ ? * Dominus virtutum ipse est rex gloriæ.
Glória Patri, et Fílio, * et Spirítui Sancto ;
Sicut erat in princípio et nunc et semper * et in sæcula sæculórum. Amen.

Psalmus 127.

Beati omnes, qui timent Dominum, * qui ambulant in viis eius.
Labores manuum tuarum quia manducabis, * beatus es et bene tibi erit.
Uxor tua sicut vitis abundans * in lateribus domus tuæ.
Filii tui sicut novellæ olivarum * in circuitu mensæ tuæ.
Ecce, sic benedicetur homo, * qui timet Dominum.
Benedicat tibi Dominus ex Sion, * et videas bona Ierusalem omnibus diebus vitæ tuæ ;
Et videas filios filiorum tuorum, * pacem super Israel.
Glória Patri, et Fílio, * et Spirítui Sancto ;
Sicut erat in princípio et nunc et semper * et in sæcula sæculórum. Amen.

Ant. Hæc accipiet benedictionem a Domino, et misericordiam a Deo salutari suo : quia hæc est generatio quærentium Dominum.

Kýrie, eléison.
Christe, eléison.
Kýrie, eléison.

V. Pater noster... secreto usque ad... et ne nos indúcas in tentatiónem.

R. Sed libéra nos a malo.

V. Salvam fac ancíllam tuam, Domine.

R. Deus meus, sperantem in te.

V. Mitte ei, Domine, auxílium de sancto.

R. Et de Sion tuere eam.

V. Nihil profíciat inimícus in ea.

R. Et fílius iniquitatis non apponat nocere ei.

V. Domine, exaudi orationem meam.

R. Et clamor meus ad te veniat.

V. Dóminus vobíscum.

R. Et cum spíritu tuo.

Orémus.          Oratio.

Deus, qui per Moysen famulum tuum Israeliticæ plebi mandasti, ut mulier, quæ suscepto semine, filium pareret, quadraginta diebus se ab ingressu templi sequestraret : dignare, Domine, hanc famulam tuam ab omni inquinamento peccati mundare, quatenus in operibus mandatorum tuorum, in corpore mundato et mente sincera, sinum matris Ecclesiæ mereatur introire, et hostias pacificas pro suis delictis offerre. Per Christum Dominum nostrum.

R. Amen.

Orémus.          Oratio.

Omnipotens sempiterne Deus, et Pater Domini nostri, Iesu Christi, qui tuum Unigenitum, una cum matre sua semper Virgine Maria, post quadraginta dierum spatium in templo præsentasti : bene+dicere digneris hanc famulam tuam post partum, et concede propitius, ut sicut eam per nostrum officium in templum istud terrenum introducimus, sic post finem vitæ præsentis in templum cæleste mereatur introire. Per eum, qui venturus est iudicare vivos et mortuos, et sæculum per ignem.

R. Amen.

Deinde extrema parte stolæ in manum mulieris data, eam introducat in templum, dicens :

Ingredere in templum Dei, adora Filium beatæ Mariæ Virginis, qui tibi fecunditatem tribuit prolis, Iesum Christum, Dominum nostrum, mediatorem Dei et hominum. Qui cum Patre et Spiritu sancto vivit et regnat, Deus, in sæcula sæculorum.

R. Amen.

Postea legat super eam hoc evangelium.

V. Dóminus vobíscum.

R. Et cum spíritu tuo.

V. Sequentia sancti Evangelii secundum Lucam.

R. Gloria tibi, Domine.

In illo tempore, postquam impleti sunt dies purgationis Mariæ secundum legem Moysi, tulerunt eum in Ierusalem, ut sisterent eum Domino, sicut scriptum est in lege Domini. Quia omne masculinum adaperiens vulvam sanctum Domino vocabitur. Et ut darent hostiam secundum quod dictum est in lege Domini par turturum, aut duos pullos columbarum. Et ecce, homo erat in Ierusalem, cui nomen Simeon, et homo iste iustus et timoratus, exspectans consolationem Israel, et Spiritus Sanctus erat in eo. Et responsum acceperat a Spiritu sancto non visurum se mortem, nisi prius videret Christum Domini. Et venit in Spiritu in templum. Et cum inducerent puerum Iesum parentes eius, ut facerent secundum consuetudinem legis pro eo, et ipse accepit eum in ulnas suas, et benedixit Deum et dixit: Nunc dimittis servum tuum, Domine, secundum verbum tuum in pace. Quia viderunt oculi mei salutare tuum. Quod parasti ante faciem omnium populorum. Lumen ad revelationem gentium, et gloriam plebis tuæ Isræl.

Finito evangelio aspergat mulierem aqua benedicta, in modum crucis, dicens :

Pax et benedictio Dei omnipotentis, Patris + et Filii et Spiritus sancti descendat super te et maneat semper.

Deinde admoneat eam, ut Deo gratias agat.

Si contigerit mulierem adversa valetudine certo tempore a purificatione impediri, differatur purificatio, donec utcumque restituta, in ecclesiam ingredi possit ; etiam si mortis immineat periculum. Quia purificatio extra ecclesiam facienda non est ; neque substituenda alia mulier purificanda in locum defunctæ puerperæ.