Benedictio imaginis

Jesu Christi Dómini nostri vel Beátæ Maríæ Vírginis vel alius Sancti.

Si Imagines, publicæ venerationi expositæ, solemniter benedicantur, hæc benedictio Ordinario reservatur, qui tamen potest eam cuilibet Sacerdoti committere. Privatim autem hæc benedictio a quolibet Sacerdote fieri potest sine ulla Ordinarii licentia.

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Omnípotens sempitérne Deus, qui Sanctórum tuórum (imagines sive effigies) sculpi aut pingi non réprobas, ut quóties illas óculis córporis intuémur tóties eórum actus et sanctitátem ad imitándum memóriæ óculis meditémur : hanc quæsumus, (imáginem seu sculptúram) in honórem et memóriam :

1. unigéniti Fílii tui Dómini nostri Jesu Christi,
2. beatíssimæ Vírginis Maríæ, matris Dómini nostri Jesu Christi,
3. beáti N., Apóstoli tui,
4. beáti N., Mártyris,
5. beáti N., Pontíficis,
6. beáti N., Confessóris,
7. beátæ N., Vírginis,
8. beátæ N., Mártyris,
9. beátæ N.,

adaptátam, bene+dícere, et sancti+ficáre dignéris : et præsta ut quicúmque coram illa

1. Unigénitum Fílium tuum
2. beatíssimam Vírginem
3. gloriósum Apóstolum
4. gloriósum Mártyrem
5. gloriósum Pontíficem
6. gloriósum Confessórem
7. gloriósam Vírginem
8. gloriósam Mártyrem
9. gloriósam mulíerem

supplíciter cólere et honoráre studúerit, illíus méritis et obténtu a te grátiam in præsénti et ætérnam glóriam obtíneat in futúrum. Per (eúmdem) Christum Dóminum nostrum.

R. Amen.

Et aspergatur aqua benedicta.