Benedictio domus
extra Tempus Paschale.

Parochus, seu alius Sacerdos, volens aliquam particularem domum, vel generaliter domos fidelium, extra Tempus Paschale aspergere aqua benedicta, ingrediens domum dicit :

V. Pax huic dómui.

R. Et ómnibus habitántibus in ea.

Deinde loca præcipua domus aspergendo, dicit Antiphonam :

Antiphona : Aspérges me, Dómine, hyssópo, et mundábor : lavábis me, et super nivem dealbábor.
Ps. 50, 3. Miserére mei, Deus, secúndum magnam misericórdiam tuam. Glória Patri, et Fílio, et Spirítui Sancto : sicut erat in princípio, et nunc et semper : et in sæcula sæculórum. Amen.
Repetitur antiphona : Aspérges me, Dómine, hyssópo, et mundábor: lavábis me, et super nivem dealbábor.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Orémus.          Oratio.

Exáudi nos, Dómine sancte, Pater omnípotens, ætérne Deus : et míttere dignéris sanctum Angelum tuum de cælis ; qui custódiat, fóveat, prótegat, vísitet, atque deféndat omnes habitántes in hoc habitáculo. Per Christum Dóminum nostrum.

R. Amen.