Alia benedictio Domus

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Orémus.          Oratio.

Te Deum Patrem omnipoténtem supplíciter exorámus pro hac domo, et habitatóribus ejus, ac rebus : ut eam bene+dícere, et sancti+ficáre, ac bonis ómnibus ampliáre dignéris : tribue eis, Dómine, de rore cœli abundántiam, et de pinguédine terræ vitæ substántiam, et desidéria voti eórum ad efféctum tuæ miseratiónis perdúcas. Ad intróitum ergo nostrum bene+dícere, et sancti+ficáre dignéris hanc domum, sicut benedícere dignátus es domum Abraham, Isaac, et Jacob : et intra pariétes domus istíus Angeli tuæ lucis inhábitent, eámque, et ejus habitatóres custódiant. Per Christum Dóminum nostrum.

R. Amen.

Et aspergantur aqua benedicta.