Benedictio Crucis

Si Cruces, publicæ venerationi expositæ, solemniter benedicantur, hæc benedictio Ordinario reservatur, qui tamen potest eam cuilibet Sacerdoti committere. Privatim autem hæc benedictio a quolibet Sacerdote fieri potest sine ulla Ordinarii licentia.

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Oremus.          Oratio.

Rogámus te, Domine sancte, Pater omnípotens, ætérne Deus : ut dignéris bene+dícere hoc signum Crucis, ut sit remédium salutáre géneri humáno ; sit solíditas fídei, proféctus bonórum óperum, redémptio animárum ; sit solámen, et protéctio, ac tutéla contra sæva jácula inimicórum. Per Christum Dóminum nostrum.

R. Amen.

Oremus.          Oratio.

Béne+dic, Dómine Jesu Christe, hanc Crucem, per quam eripuísti mundum a potestáte dæmonum, et superásti passióne tua suggestórem peccáti, qui gaudébat in prævaricatióne primi hóminis per ligni vétiti sumptiónem. Hic aspergatur aqua benedícta. Sanctificétur hoc signum Crucis in nómine Pa+tris, et Fí+lii, et Spíritus + Sancti ; ut orántes, inclinantésque se propter Dóminum ante istam Crucem, invéniant córporis et ánimæ sanitátem. Per eúmdem Christum Dóminum nostrum.

R. Amen.

Postea Sacerdos ante Crucem genuflexus ipsam devote adorat, et osculatur, et idem faciunt quicumque voluerint.