Benedictio Coronæ S. Joseph

Propria Ordinis Carmelitarum.

V. Adjutórium nostrum in nómine Dómini.

R. Qui fecit cælum et terram.

V. Dóminus vobíscum.

R. Et cum spíritu tuo.

Oremus.          Oratio.

Omnípotens et miséricors Deus, qui propter nímiam caritátem, qua dilexísti nos, Fílium tuum unigénitum Dóminum nostrum Jesum Christum pro redemptióne nostra de cælis in terram descéndere, et de Beatíssimæ Vírginis Maríæ útero, Angelo nuntiánte, carnem suscípere voluísti, ut nos de potestáte inimíci eríperes : obsecrámus cleméntiam tuam, ut hanc corónam in honórem, et laudem ejúsdem Genitrícis Fílii tui, ac perdilécti ejus Sponsi Joseph, conféctam, et dicátam, bene+dícas, eíque tantam Sancti + Spíritus virtútem infúndas ; ut, quicúmque hanc secum portáverit, atque in domo sua reverénter tenúerit, ab omni hoste visíbili et invisíbili, semper et ubíque in hoc sæculo liberétur, et in éxitu suo, a beatíssimis illis Sponsis, plenus bonis opéribus tibi præsentári mereátur. Per eúmdem Dóminum nostrum Jesum Christum Fílium tuum : Qui tecum vivit et regnat in unitáte ejúsdem Spíritus.

R. Amen.

Et aspergantur aqua benedicta.