Benedíctio fontis
seu aquæ baptísmalis

Hæc formula brevior pro benedictione Fontis seu aquæ baptismalis, a Paulo Papa III Missionariis Peruanis apud Indos olim concessa, nonnisi in iis locis adhiberi potest, ad quæ speciali Apostolicæ Sedis indulto extensa fuit.

Exorcismus aquæ :

Exorcízo te, creatúra aquæ, in nómine Dei Pa+tris omnipoténtis, et in nómine Jesu + Christi Fílii ejus Dómini nostri, et in virtúte Spíritus + Sancti. Exorcízo te, omnis virtus adversárii diáboli : ut omnis phantásia eradicétur, ac effugétur ab hac creatúra aquæ, et fiat fons aquæ saliéntis in vitam ætérnam : ut, qui ex ea baptizáti fúerint, fiant templum Dei vivi, et Spíritus Sanctus hábitet in eis, in remissiónem peccatórum : in nómine Dómini nostri Jesu Christi, qui ventúrus est judicáre vivos et mórtuos, et sæculum per ignem.

R. Amen.

Oremus.          Oratio.

Dómine sancte, Pater omnípotens, ætérne Deus, aquárum spirituálium sanctificátor, te supplíciter deprecámur : ut hoc ministérium humilitátis nostræ respícere dignéris, et super has aquas, abluéndis et vivificándis homínibus præparátas, Ángelum sanctitátis emíttas ; ut peccátis prióris vitæ ablútis, reatúque detérso, purum sacráto Spirítui habitáculum regeneratiónibus procúret. Per Christum Dóminum nostrum.

R. Amen.

Sacerdos deinceps infundat Oleum Catechumenorum in aquam, in modum crucis, dicens :

Conjúnctio Olei unctiónis, et aquæ Baptísmatis sanctificétur, et fœcundétur. In nómine Pa+tris, et Fí+lii, et Spíritus + Sancti.

R. Amen.

Deinde infundat Chrisma in aquam, in modum crucis, dicens :

Conjúnctio Chrísmatis sanctificatiónis et Olei unctiónis et aquæ Baptísmatis sanctificétur, et fœcundétur. In nómine Pa+tris, et Fí+lii, et Spíritus + Sancti.

R. Amen.