Benedictio pluribus Adulti Ægrotantis

Sacerdos, cubiculum Ægrotantium ingrediens, dicat :

V. Pax huic dómui.

R. Et ómnibus habitántibus in ea.

Et continuo, ad infirmum accedens, subiungat :

V. Adjutórium nostrum in nómine Dómini.

R. Qui fecit cælum et terram.

V. Dómine, exáudi oratiónem meam.

R. Et clamor meus ad te véniat.

V. Dóminus vobíscum.

R. Et cum spíritu tuo.

Oremus.          Oratio.

Intróeat, Dómine Jesu Christe, domum hanc ad nostræ humilitátis ingréssum pax et misericórdia tua ; effúgiat ex hoc loco omnis nequítia dæmonum, adsint Angeli pacis, domúmque hanc déserat omnis malígna discórdia. Magnífica, Dómine, super nos nomen sanctum tuum : et bénedic nostræ conversatióni : Qui sanctus et pius es, et pérmanes cum Patre et Spíritu Sancto in sæcula sæculórum.

R. Amen.

Oremus.          Oratio.

Réspice, Dómine, (fámulos tuos vel fámulas tuas) in infirmitáte córporis laborántem, et ánimas réfove quas creásti : ut castigatiónibus (emendáti vel emendátæ), contínuo se séntiat tua miseratióne (salvátos vel salvátas). Per Christum Dóminum nostrum.

R. Amen.

Oremus.          Oratio.

Miséricors, Dómine, fidélium consolátor, quæsumus imménsam pietátem tuam, ut ad intróitum humilitátis nostræ (hos fámulos tuos vel has fámulas tuas) super lectum dolóris sui jacéntem, visitáre dignéris, sicut socrum Simónis visitásti : propítius adésto ei, Dómine, quátenus prístina sanitáte recépta, gratiárum tibi in Ecclésia tua réferat actiónes : qui vivis et regnas Deus in sæcula sæculórum.

R. Amen.

Deinde, extendens dexteram versus ægrotos, dicat :

Dóminus Jesus Christus apud vos sit, ut vos deféndat : intra vos sit, ut vos consérvet : ante vos sit, ut vos ducat : post vos sit, ut vos custódiat : super vos sit, ut vos benedícat : qui cum Patre et Spíritu Sancto vivit et regnat in sæcula sæculórum.

R. Amen.

Benedíctio Dei omnipoténtis, Pa+tris, et Fílii, et Spíritus Sancti, descéndat super vos, et máneat semper.

R. Amen.

Demum aspergat infirmos aqua benedicta.