Ad Mentem Summi Pontificis

V. Pater noster, qui es in cælis, sanctificétur nomen tuum. Advéniat regnum tuum. Fiat volúntas tua, sicut in cælo, et in terra.

R. Panem nostrum quotidiánum da nobis hódie. Et dimítte nobis débita nostra, sicut et nos dimíttimus debitóribus nostris. Et ne nos indúcas in tentatiónem: sed libéra nos a malo. Amen.

V. Ave, María, grátia plena, Dóminus tecum, benedícta tu in muliéribus, et benedíctus fructus ventris tui, Jesus.

R. Sancta María, Mater Dei, ora pro nobis peccatóribus, nunc et in hora mortis nostræ. Amen.

Plenaria indulgentia conceditur christifideli qui Rosarium mariale pie recitaverit in ecclesia aut oratorio, vel in familia, in religiosa Communitate, in christifidelium consociatione et generatim cum plures ad aliquem honestum finem conveniunt […]. Quoad indulgentiam plenariam pro recitatione Rosarii marialis hæc statuuntur :

1. sufficit recitatio tertiæ tantum ejus partis ; sed quinque decades continuo recitari debent ;
2. orationi vocali addenda est pia mysteriorum meditatio ;
3. in publica recitatione, mysteria enuntiari debent juxta probatam loci consuetudinem […].

(Enchiridion Indulgentiarum, 16 julii 1999, Concessio XVII).

Ad indulgentiam plenariam assequendam, præter omnimodam exclusionem affectus erga quodcumque peccatum etiam veniale, requiruntur exsecutio operis indulgentia ditati et adimpletio trium condicionum, quæ sunt :

1. sacramentalis confessio,
2. communio eucharistica
3. et oratio ad mentem Summi Pontificis.

(Enchiridion Indulgentiarum, 16 julii 1999, Norma XX).